सीहोरम् । संस्कृतसप्ताहस्य अन्तर्गतं अगस्तमासस्य ८ दिनाङ्के सीहोर-नगरस्य शासकीय-मॉडलविद्यालये विशेष व्याख्यानस्य आयोजनं कृतम्। ‘जीवने संस्कृत भाषायाः प्रासंगिकता’ इति विषये एतत् व्याख्यानं आयोजितम् , यस्मिन् श्रीचिन्तामणगणेशमन्दिरस्य सीहोरनगरस्य मुख्यपुरोहितः तथा संस्कृत भारत्याः सीहोरस्य जिलाध्यक्षः पण्डित श्रीपृथ्वी वल्लभ दुबे वर्येण मुख्य वक्तृरूपेण व्याख्यानं प्रदत्तम्। सर्वादौ पं. पृथ्वी वल्लभ दुबे महोदयेन सकल विद्यालयपरिवाराय संस्कृतसप्ताहस्य शुभकामनाः प्रदत्ता छात्रान् च सम्बोधयन् उक्तं यत् संस्कृतं केवलं विषयः न अपितु मूल्यानां भाषा अस्ति। अस्यां दया, सहिष्णुता, शरणागतवत्सलता इत्यादयः उपयोगिनाः गुणाः सन्ति, ये च समग्रं भारतं एकस्मिन् सूत्रे बध्नन्ति। सः छात्रान् संस्कृतग्रन्थान् अध्ययनं कृत्वा व्यवहारे स्थापयित्वा स्वजीवनं समृद्धं कर्तुं प्रेरितवान्। तेनोक्तं यत् संस्कृतं न केवलं शास्त्रभाषा, अपितु वैज्ञानिकदृष्ट्या अतीव व्यवस्थिता तार्किकभाषा अस्ति, या च सफलजीवनाय आवश्यकी। विद्यालयस्य प्राचार्या डॉ. मीता सक्सेना अपि स्वविचारं प्रकटयन् उक्तवती यत् संस्कृतभाषा सङ्गणकादिषु आधुनिक तकनीकी क्षेत्रेषु अपि उपयोगिनी वर्तते। अतः संस्कृत भाषायाःअध्ययनं छात्राणांकृते अतीव लाभप्रदं भविष्यति।
कार्यक्रमे हिन्दी शिक्षकः महेश वर्म महोदयः, इतिहास शिक्षकः अभिषेक श्रीवास्तव महोदयः, आङ्ग्लशिक्षकः दिनेश वर्म महोदयः च संस्कृतभाषायाः महत्त्वं प्रतिपादित वन्तः। विद्यालयस्य अन्ये शिक्षकाः छात्राः च उत्साहेन भागं गृहीतवन्तः। कार्यक्रमस्य कुशलतापूर्वकं सञ्चालनं संस्कृत शिक्षक डॉ. धर्मेन्द्रशर्मणा कृतम्।